पर्सा प्रहरी–वीरगञ्ज हेल्थ केयरबीच दुईवर्षे स्वास्थ्य सेवा सम्झौता
वीरगञ्ज । जिल्ला प्रहरी कार्यालय पर्सा र वीरगञ्ज हेल्थ केयर अस्पताल प्रा.लि.बीच प्रहरी कर्मचारी तथा न्यायिक हिरासतमा रहेका थुनुवालाई स्वास्थ्य सेवा उपलब्ध गराउने विषयमा दुईवर्षे सम्झौता भएको छ।
सम्झौताअनुसार प्रत्येक शुक्रबार दिउँसो २ बजेदेखि ५ बजेसम्म जिल्ला प्रहरी कार्यालय, मातहतका प्रहरी कार्यालय तथा न्यायिक हिरासतमा रहेका थुनुवा र प्रहरी कर्मचारीको निःशुल्क स्वास्थ्य परीक्षण गरिनेछ। परीक्षणका लागि अस्पतालका चिकित्सक तथा स्वास्थ्यकर्मीको टोली खटिनेछ।
थप उपचार आवश्यक देखिएका व्यक्तिलाई स्वास्थ्य बीमा बोर्डले निर्धारण गरेको दररेटअनुसार उपचार सेवा उपलब्ध गराउने व्यवस्था पनि सम्झौतामा गरिएको छ।
सम्झौतामा पर्साका प्रहरी उपरीक्षक पवन कुमार भट्टराई, प्रहरी नायब उपरीक्षक चन्द्रबहादुर मल्ल तथा वीरगञ्ज हेल्थ केयरका अध्यक्ष डा. अब्दुल हैस अन्सारी र प्रमुख प्रशासनिक अधिकृत भूमिका अधिकारीले हस्ताक्षर गरेका छन्।
सम्झौता २०८२ भदौ ३१ गतेदेखि लागू भई दुई वर्षसम्म कायम रहनेछ। दुवै पक्षको सहमतिमा सम्झौता नवीकरण गर्न सकिने व्यवस्था गरिएको छ।
