**चुनाव नजिकिँदै गर्दा फेरि उही अनुहार, उही आश्वासन
- पर्सा–३ मा पूर्वमन्त्री सुरेन्द्र चौधरीमाथि जनआक्रोश चुलिँदै**
चुनावी सरगर्मी बढेसँगै पर्सा क्षेत्र नं–३ मा पूर्वमन्त्री सुरेन्द्र चौधरी फेरि सक्रिय देखिन थालेका छन्। तर उनको यो सक्रियता स्वागतभन्दा बढी विवादको केन्द्र बनेको छ। स्थानीय बासिन्दाहरूका अनुसार, वर्षौंदेखि उपेक्षित भलुवाही खोलाको पुलदेखि आधारभूत विकाससम्मका मुद्दा चुनाव आउँदासमेत उनको प्राथमिकतामा कहिल्यै परेनन्।
स्थानीयको आरोप छ—सुरेन्द्र चौधरीले चुनावअघि जनतालाई मीठा शब्द र ठूला सपना देखाएर भोट माग्ने गरे, तर सांसद र मन्त्री बन्दा ती आश्वासनहरू कागजमै सीमित भए। “भलुवाही खोलाको पुल हाम्रा लागि जीवन–मरणको सवाल हो, तर चुनावअघि एकपटक पनि सम्झनु भएन,” स्थानीय एक बासिन्दाले आक्रोश पोख्दै भने।
पर्सा–३ का विभिन्न गाउँमा विकासका नाममा ठोस उपलब्धि नदेखिएको भन्दै जनगुनासो बढ्दो छ। सडक, शिक्षा, स्वास्थ्य र रोजगारीजस्ता आधारभूत आवश्यकता अझै पनि अधुरै छन्। पटक–पटक सांसद बनेका चौधरीले न त दीर्घकालीन योजना ल्याए, न त क्षेत्रको समग्र विकासका लागि प्रभावकारी पहल गरेको जनआरोप छ।
चुनावी मौसममा मात्रै जनताबीच देखिने, फोटो खिच्ने र भाषण गर्ने तर जितेपछि हराउने राजनीतिक संस्कृतिको प्रतीक बनेको आरोप पनि उनीमाथि लाग्दै आएको छ। यही कारण, यसपटक पर्सा–३ मा उनको उम्मेदवारीलाई लिएर असन्तुष्टि र विरोधका स्वर खुला रूपमा सुनिन थालेका छन्।
राजनीतिक विश्लेषकहरू भन्छन्—अब पर्सा–३ का मतदाता भावनात्मक भाषणभन्दा कामको हिसाब खोजिरहेका छन्। झुटा आश्वासन र अधुरा वाचाले अब काम नगर्ने संकेत देखिन थालेको छ। सुरेन्द्र चौधरीमाथि उठेको यो विवादले आगामी चुनावी परिणाममा कस्तो असर पार्ला, त्यो भने मतपेटिकाले नै तय गर्नेछ।
