चुनावी सहानुभूतिको राजनीति? – चौरसियाको घाइते पटेलसँगको भेटमाथि उठे प्रश्न
पर्सा–१ मा नेकपाका उम्मेदवार CA अजय चौरसियाले मधेस आन्दोलनका घाइते मन्सी पटेलसँग भेटघाट गरेका छन्। चुनाव नजिकिँदै गर्दा भएको यो भेटलाई धेरैले मानवीय भन्दा पनि राजनीतिक रणनीतिका रूपमा अर्थ्याउन थालेका छन्।
मधेस आन्दोलनका क्रममा घाइते भएका पटेलसँग भेटेर चौरसियाले स्वास्थ्य अवस्था बुझ्नुका साथै सहयोगको आश्वासन दिएका थिए। तर वर्षौंदेखि घाइतेहरूको उचित उपचार र राहतका विषयमा ठोस पहल नभएको अवस्थामा अहिले मात्र देखाइएको चासोप्रति स्थानीयले प्रश्न उठाएका छन्।
मतदाताहरूका अनुसार मधेस आन्दोलनका पीडितहरू लामो समयदेखि बेवास्तामा पर्दै आएका छन्। चुनावी माहोल सुरु भएसँगै नेताहरूको सहानुभूति अचानक जाग्नु संयोग मात्र होइन भन्ने बुझाइ धेरैको छ।
यस भेटघाटलाई कतिपयले सकारात्मक कदम माने पनि आलोचकहरूले भने यो शुद्ध चुनावी प्रचारको हिस्सा मात्र भएको टिप्पणी गरेका छन्।
