“एकै बापका सन्तान हौँ भने सबैलाई लालपुर्जा दिन्छौँ”– कांग्रेस उम्मेदवार सुरेन्द्र चौधरीको विवादित अभिव्यक्ति
नेपाली कांग्रेसका उम्मेदवार सुरेन्द्र चौधरीले चुनावी कार्यक्रममा दिएको अभिव्यक्तिले अहिले राजनीतिक वृत्तमा नयाँ विवाद सिर्जना गरेको छ।
चुनावी क्रममा मतदाता संग भेटी चौधरीले भने, “हम एक बापके बेटा होखेम त सबके लाल पुर्जा देहम,” अर्थात् “यदि हामी एउटै बुबाका सन्तान हौँ भने सबैलाई लालपुर्जा दिनेछौँ।” उनको यो भनाइलाई लिएर सामाजिक सञ्जालदेखि स्थानीय तहसम्म विभिन्न प्रतिक्रिया आउन थालेका छन्।
भूमिहीन तथा सुकुम्बासी समस्या समाधानलाई प्राथमिकतामा राख्दै उनले यस्तो प्रतिबद्धता जनाए पनि प्रयोग गरिएको भाषाशैली र शब्द चयनलाई कतिपयले असंवेदनशील र विवादास्पद ठहर गरेका छन्। विपक्षी दलका नेताहरूले यसलाई चुनावी लोकप्रियता कमाउने भावनात्मक अभिव्यक्ति मात्र भएको टिप्पणी गरेका छन्।
यद्यपि चौधरी समर्थकहरूले भने उनको भनाइलाई जनताको हितका लागि गरिएको स्पष्ट प्रतिबद्धताका रूपमा व्याख्या गरेका छन्। उनीहरूले लामो समयदेखि लालपुर्जाविहीन नागरिकको समस्या समाधान गर्न चौधरीले आवाज उठाउँदै आएको दाबी गरेका छन्।
निर्वाचन नजिकिँदै गर्दा उम्मेदवारहरूको भाषण र अभिव्यक्तिले राजनीतिक माहोल थप तात्दै गएको छ। चौधरीको यो भनाइ आगामी दिनमा थप बहसको विषय बन्ने देखिएको छ।
