पर्सा–३ मा रुपेश पाण्डेमाथि स्थानीयको अविश्वास, भरोसा योग्य नभएको आरोप
पर्सा – नेकपा एमालेबाट पर्सा निर्वाचन क्षेत्र नं. ३ का उम्मेदवार रुपेश पाण्डेप्रति स्थानीय मतदाताहरूको विश्वास कमजोर हुँदै गएको पाइएको छ। विशेषगरी पोखरिया क्षेत्रका बासिन्दाहरूले पाण्डे लामो समयदेखि जिल्लाबाहिर बस्दै आएको र जनताको समस्या तथा सुख–दुःखमा कहिल्यै साथ नदिएको गम्भीर आरोप लगाएका छन्।
स्थानीयका अनुसार चुनाव नजिकिएपछि मात्र पाण्डे गाउँ–टोलमा देखा पर्ने गरेका छन्। “विगतका वर्षहरूमा उहाँ कहिल्यै जनताका बीचमा देखिनुभएन, अहिले भोट माग्न मात्र आउनुभएको छ,” एक स्थानीय अगुवाले बताए। उनीहरूले जनतासँग प्रत्यक्ष सम्पर्क नराख्ने नेतामा भरोसा गर्न कठिन हुने धारणा व्यक्त गरेका छन्।
एमालेकै केही स्थानीय नेताहरूले समेत पाण्डेप्रति खुलेर असन्तुष्टि जनाएका छन्। उनीहरूले पाण्डेमा पार्टी संगठनप्रति निष्ठा र समर्पणको कमी देखिएको भन्दै यस्तो उम्मेदवारलाई अघि सार्नु पार्टीका लागि जोखिमपूर्ण हुन सक्ने बताएका छन्।
निर्वाचनको मिति नजिकिँदै जाँदा पर्सा–३ मा उम्मेदवारप्रति बढ्दै गएको असन्तुष्टि र अविश्वासले आगामी चुनावी समीकरणलाई थप रोचक बनाउने देखिएको छ।
