चैती छठको दोस्रो दिन आज: खरना विधि श्रद्धापूर्वक सम्पन्न
चैती छठ पर्वको दोस्रो दिन आज देशभर श्रद्धा र भक्तिभावका साथ ‘खरना’ विधि सम्पन्न गरिएको छ। छठका ब्रतालुहरूले दिनभर निर्जला व्रत बसेपछि साँझपख विशेष विधिअनुसार पूजा गरी ‘रसियाव–रोटी’ प्रसाद तयार पारेर भगवान सूर्य र छठी मातालाई अर्पण गरेका छन्।
खरना विधिमा चोखो र शुद्ध स्थानमा प्रसाद पकाइन्छ, जसमा चामलको खीर (रसियाव), गहुँको पिठोबाट बनेको रोटी तथा केरा लगायतका फलफूल समावेश गरिन्छ। पूजा सम्पन्न भएपछि ब्रतालुहरूले यही प्रसाद ग्रहण गरी उपवास तोड्ने चलन रहेको छ।
तराई–मधेशका जिल्लासहित देशका विभिन्न स्थानमा छठ पर्वको उल्लास देखिएको छ। भक्तजनहरू परम्परागत गीत–संगीतसँगै धार्मिक आस्थामा लीन भई विधिपूर्वक पूजा–आराधना गरिरहेका छन्।
