विरगंज – २०८२असोज ७
सरकारले तीन जना सचिवहरूको सरुवा गरेको छ। आइतबार साँझ बसेको मन्त्रिपरिषद् बैठकले विभिन्न मन्त्रालय तथा निकायमा कार्यरत सचिवहरूको सरुवा गर्ने निर्णय गरेको हो।
सरुवाअनुसार वर्तमान गृहसचिव गोकर्णमणी दुवाडीलाई राष्ट्रिय योजना आयोगको सचिव बनाइएको छ। उनको स्थानमा हाल रक्षा मन्त्रालयको सचिव रहेका रामेश्वर दंगाललाई गृहसचिवको जिम्मेवारी दिइएको छ।
त्यस्तै, राष्ट्रिय योजना आयोगका सचिव सुमनराज अर्याललाई रक्षा मन्त्रालयको सचिवको रूपमा पठाइएको छ।
यो निर्णय आइतबारै भएको भए पनि आज मात्रै सार्वजनिक भएको हो।
गृहसचिव दुवाडी जेनजी आन्दोलनका क्रममा पदीय दुरुपयोगको आरोपमा विवादमा आएका थिए। उनलाई तत्कालीन गृहमन्त्री रमेश लेखकले सरुवा गरेर गृह मन्त्रालयमा ल्याएका थिए।
सरकारको यो निर्णयलाई प्रशासनिक सन्तुलनको रूपमा हेरिएको छ भने केही विश्लेषकहरूले यो सरुवालाई राजनीतिक दबाबको परिणामको रूपमा पनि देखिरहेका छन्।
