असोज २१ – बिहारमा आगामी ६ र ११ नोभेम्बरमा दुई चरणमा विधानसभा निर्वाचन सम्पन्न हुने भएको छ। करिब ४० वर्षपछि दुई चरणमा निर्वाचन हुन लागेको हो।
सोमबार मुख्य निर्वाचन आयुक्त ज्ञानेश कुमारले पत्रकार सम्मेलनमार्फत पहिलो चरणमा १२१ सिट र दोस्रो चरणमा १२२ सिटका लागि मतदान हुने जानकारी दिएका हुन्।
निर्वाचन आयोगका अनुसार दुवै चरणको मतदान सम्पन्न भएपछि १४ नोभेम्बरमा मतगणना गरिनेछ र त्यसपछि नयाँ सरकारको टुंगो लाग्नेछ। आचारसंहिता लागू भइसकेकाले पहिलो चरणसम्म करिब एक महिना समय बाँकी छ।
पहिलो चरणको मतदान उत्तर बिहारका तिरहुत, मिथिलाञ्चल, कोसीलगायत क्षेत्रहरूमा हुने भएको छ भने दोस्रो चरणको मतदान मगध र शाहाबाद क्षेत्रहरूमा हुनेछ। अघिल्ला निर्वाचनहरूमा यी क्षेत्रहरूमा पहिलो चरणमै मतदान हुने परम्परा रहेको थियो।
पहिलो चरणमा दरभंगा, मधेपुरा, सहरसा, खगडिया, गोपालगञ्ज, मुंगेर र नालन्दा लगायतका जिल्लामा मतदान हुनेछ। यी क्षेत्रहरूलाई सत्तारूढ एनडीए गठबन्धनको बलियो आधार क्षेत्र मानिन्छ। सन् २०२० को विधानसभामा १२१ सिटमध्ये ५९ सिटमा एनडीए विजयी भएको थियो। यसपटक पनि उनीहरूको पकड अझ सुदृढ भएको अनुमान गरिएको छ।
दोस्रो चरणको मतदान हुने क्षेत्रहरू भने महागठबन्धनको प्रभाव क्षेत्र मानिन्छन्। नेपालसँग सिमाना जोडिएका अधिकांश जिल्लाहरूमा पनि दोस्रो चरणमै मतदान हुने कार्यक्रम रहेको छ।
