पर्सा जिल्लाको वीरगञ्जकी आयुषा कापरी जिल्लाकै सबैभन्दा कान्छी पाइलट बनेर नयाँ इतिहास रच्न सफल भएकी छन्। २०६१ साल असार १५ गते जन्मिएकी कापरीले आधुनिक प्रविधि, कडा अनुशासन र उच्च सुरक्षा मापदण्डका लागि विश्वभर परिचित अमेरिकाबाट पाइलट अध्ययन पूरा गरेकी हुन्।
अमेरिकामा अध्ययनका क्रममा उनले अत्यन्तै कठिन, चुनौतीपूर्ण र प्रतिस्पर्धात्मक प्रशिक्षण प्रक्रिया पार गर्दै उड्डयन क्षेत्रमा आवश्यक सैद्धान्तिक ज्ञानसँगै व्यवहारिक सीपसमेत हासिल गरिन्। लामो समयसम्म निरन्तर अभ्यास, अनुशासन र मेहनतको परिणामस्वरूप कापरीले झण्डै २२ वर्षकै उमेरमा पाइलट प्रशिक्षण सफलतापूर्वक सम्पन्न गर्न सफल भइन्।
उनको यो उपलब्धिले पर्सा जिल्लामात्र होइन, सिंगो देशका युवायुवतीहरूका लागि प्रेरणाको स्रोत बनेको छ। विशेषगरी महिलाहरूका लागि चुनौतीपूर्ण मानिने उड्डयन क्षेत्रमा आयुषाको सफलताले सपना देख्ने र त्यसलाई पूरा गर्ने साहस गर्न सकिने सन्देश दिएको छ। परिवारको साथ, आफ्नै दृढ इच्छाशक्ति र कडा परिश्रमकै कारण उनले अन्तर्राष्ट्रिय स्तरको शिक्षा हासिल गर्दै आफ्नो लक्ष्यमा पुग्न सकेकी हुन्।
