सामाजिक योगदान शून्य देखिँदा जसपा उम्मेदवार टेमानीको चुनावी अवस्था कमजोर
पर्सा क्षेत्र नम्बर–२ मा जनता समाजवादी पार्टी (जसपा) का उम्मेदवार अशोक कुमार टेमानीको चुनावी अभियान अपेक्षाअनुसार अघि बढ्न नसकेको देखिएको छ। विगतका दिनमा समाजसेवा, विकास निर्माण वा जनसरोकारका काममा उनको कुनै उल्लेखनीय योगदान नदेखिएकाले मतदातामा विश्वासको वातावरण बन्न सकेको छैन।
स्थानीयस्तरमा लामो समयदेखि निष्क्रिय रहेको आरोप खेप्दै आएका टेमानी चुनाव नजिकिएपछि मात्रै सक्रिय देखिएको भन्दै जनताले आलोचना गर्न थालेका छन्। सामाजिक क्षेत्रमा लगानी र सहभागिता न्यून भएकाले उनको उम्मेदवारीप्रति आम नागरिकमा उत्साह कम देखिएको राजनीतिक विश्लेषकहरू बताउँछन्।
अन्य प्रतिस्पर्धी उम्मेदवारहरू जनतासँग प्रत्यक्ष भेटघाट, घरदैलो र विकासका एजेन्डासहित सक्रिय भइरहँदा टेमानीको उपस्थिति फितलो देखिनु उनको लागि मुख्य चुनौती बनेको छ। यही कारण पर्सा–२ मा उनको चुनावी अवस्था दिनप्रतिदिन चिन्ताजनक बन्दै गएको चर्चा छ।
