जगरनाथपुर–२२ मा अनिल रुङटाको घरदैलो : दाबी धेरै, विश्वासमा प्रश्नचिन्ह
जगरनाथपुर गाउँपालिका–२२ मा नेपाली कांग्रेस क्षेत्र नं. १ का उम्मेदवार अनिल रुङटाले आयोजना गरेको रात्री घरदैलो कार्यक्रम सम्पन्न भएको छ। कार्यक्रमलाई भव्य र उत्साहपूर्ण भनिए पनि स्थानीय स्तरमा भने यसप्रति मिश्रित प्रतिक्रिया देखिएको छ।
घर–घर पुगेर मतदातासँग संवाद गर्ने क्रममा उम्मेदवार रुङटाले संविधान रक्षा, लोकतन्त्रको मजबुती, समावेशी विकास, शिक्षा–स्वास्थ्य, रोजगारी र पूर्वाधार विकासलाई आफ्नो प्रमुख एजेन्डा भएको दाबी गरे। उनले कांग्रेसले विगतमा लोकतन्त्रका लागि ठूलो भूमिका खेलेको भन्दै आगामी निर्वाचनलाई विकास र स्थायित्वको निर्णायक मोड भएको बताए।
तर स्थानीय केही मतदाताले भने विगतमा पटक–पटक आश्वासन मात्रै बाँडिएको, तर व्यवहारमा अपेक्षित विकास नदेखिएको गुनासो गरेका छन्। “हरेक चुनावमा यस्तै भाषण सुनिन्छ, तर चुनाव सकिएपछि नेताहरू फर्केर आउँदैनन्,” एक स्थानीयले नाम नखुलाउने सर्तमा टिप्पणी गरे।
कार्यक्रममा कांग्रेस पर्साका कार्यवाहक सभापति रामनारायण कुर्मी, पूर्व सभापति अजय द्विवेदी, क्षेत्रीय सभापति अरबिन्द गुप्ता, उपसभापति अनिल सिंह, सचिव हरि यादवसहित पार्टीका थुप्रै नेता–कार्यकर्ताको बाक्लो उपस्थिति रहेको थियो। नेताहरूको उपस्थितिलाई शक्ति प्रदर्शनको रूपमा हेरिए पनि आम सर्वसाधारणको वास्तविक समस्या समाधानप्रति कति गम्भीरता छ भन्ने प्रश्न भने यथावत् छ।
क्षेत्र नं. १ मा चुनावी माहोल तात्दै जाँदा कांग्रेसको यो कार्यक्रमलाई संगठन सुदृढीकरणको प्रयास भनिए पनि मतदाताबीच विश्वास जित्न अझै धेरै मेहनत आवश्यक रहेको विश्लेषकहरूको भनाइ छ।
