पकाहामैनपुर–४ मा एमालेको घरदैलो तीव्र, रूपेश पाण्डेले देखाए विकासको रोडम्याप
वीरगञ्ज – पर्साको पकाहामैनपुर गाउँपालिका वडा नं.–४ मा नेकपा एमालेले सञ्चालन गरेको घरदैलो तथा मतदाता भेटघाट कार्यक्रम प्रभावशाली रूपमा सम्पन्न भएको छ। स्थानीयवासीको सक्रिय सहभागिताले चुनावी माहोल थप तताएको देखिएको छ।
प्रतिनिधिसभा निर्वाचन क्षेत्र नं.–३ का उम्मेदवार रूपेश कुमार पाण्डेले कार्यक्रमलाई सम्बोधन गर्दै राष्ट्रियता, स्थायित्व र समृद्धिको एजेन्डालाई प्राथमिकतामा राखेका छन्। उनले मुलुकको राजनीतिक अस्थिरताले विकास प्रभावित भएको उल्लेख गर्दै अब स्थिर सरकारमार्फत तीव्र आर्थिक रूपान्तरण आवश्यक रहेको धारणा राखे।
“पर्सा–३ लाई कृषि उत्पादन, साना तथा मझौला उद्योग र रोजगारी सिर्जनाको केन्द्रका रूपमा विकास गर्ने ठोस कार्ययोजना हाम्रो प्राथमिकता हो,” पाण्डेले भने। उनले युवा नेतृत्वमार्फत पारदर्शी र जवाफदेही राजनीति स्थापना गर्ने प्रतिबद्धता समेत जनाए।
घरदैलोका क्रममा स्थानीय मतदाताहरूले विकास, रोजगारी र पूर्वाधार सुधारका विषयमा आफ्ना अपेक्षा राखेका थिए। सहभागीहरूले पाण्डेको एजेन्डाप्रति सकारात्मक प्रतिक्रिया दिँदै आगामी फागुन २१ गते हुने निर्वाचनमा समर्थन गर्ने संकेत दिएका छन्।
एमालेका जिल्ला तहका नेताकार्यकर्ताको सक्रिय उपस्थितिले कार्यक्रमलाई थप सशक्त बनाएको थियो। पार्टीले अब निर्वाचन क्षेत्रभर अभियानलाई थप तीव्र बनाउने जनाएको छ।
