पर्सा–३ मा युवा नेतृत्वको उभार: रूपेश कुमार पाण्डेको विकास एजेन्डा चर्चामा
वीरगञ्ज । पर्सा निर्वाचन क्षेत्र नम्बर–३ मा प्रतिनिधिसभा निर्वाचन नजिकिँदै जाँदा राजनीतिक गतिविधि तीव्र बनेको छ। विकास, सुशासन र पारदर्शिताको बहसबीच रूपेश कुमार पाण्डे युवा पुस्ताको सक्रिय र भरोसायोग्य अनुहारका रूपमा अघि बढिरहेका छन्।
पछिल्लो तीन वर्ष आठ महिनादेखि क्षेत्रका बस्ती–बस्ती पुगेर जनताको समस्या बुझ्दै आएका पाण्डेले पर्सा–३ लाई समृद्ध बनाउने स्पष्ट कार्यदिशा सार्वजनिक गरेका छन्। टोलस्तरका अन्तरक्रिया, सरोकारवालासँग समन्वय र प्रत्यक्ष जनसम्पर्कमार्फत उनले शिक्षा, स्वास्थ्य, कृषि, सिँचाइ, सडक पूर्वाधार, रोजगारी तथा युवा उद्यमशीलतालाई प्राथमिकतामा राखेका छन्।
नेपाल कम्युनिष्ट पार्टी (एमाले)का तर्फबाट उम्मेदवारी तयारीमा रहेका पाण्डेले सही नीति, इमानदार नेतृत्व र जनसहभागितामा आधारित विकास मोडेलमार्फत क्षेत्रको रूपान्तरण सम्भव रहेको बताएका छन्।
पर्सा–३ मा शिक्षा र स्वास्थ्य सेवाको पहुँच अभाव, खानेपानी समस्या, कृषि उत्पादनको बजारीकरण, युवाको वैदेशिक पलायन तथा आधारभूत पूर्वाधार कमजोरीजस्ता विषयमा उनले निरन्तर आवाज उठाउँदै आएका छन्। युवावर्ग, किसान र साना व्यवसायीबीच उनको बढ्दो सक्रियताले चुनावी समीकरणमा प्रभाव पार्ने विश्लेषण गरिएको छ।
आगामी फागुन २१ गते हुने प्रतिनिधिसभा निर्वाचनले पर्सा–३ को राजनीतिक दिशा तय गर्नेछ। विकासमुखी एजेन्डा र ग्रासरूट राजनीतिलाई केन्द्रमा राखिएको अभियानले मतदाताबाट कस्तो प्रतिक्रिया पाउँछ, त्यो भने निर्वाचन परिणामले स्पष्ट पार्नेछ।
