संसदमा राजसंस्थाको एजेन्डा राप्रपाकै कारण घन्किएको दाबी
काठमाडौँ — राजेन्द्र लिङ्देन ले संसदमा राजसंस्थासम्बन्धी बहस राप्रपाकै सक्रियताका कारण उठिरहेको बताएका छन्।
राष्ट्रिय प्रजातन्त्र पार्टी (राप्रपा) का अध्यक्ष लिङ्देनले पार्टी राजाको नभई राजसंस्था मान्नेहरूको भएको स्पष्ट पारे। उनले राजसंस्था कुनै एक पार्टीको विषय नभई सबैभन्दा माथि रहने अवधारणा भएको उल्लेख गरे।
तनहुँमा आयोजित कार्यक्रमलाई सम्बोधन गर्दै उनले राप्रपालाई “राजाको पार्टी” भनेर प्रचार गर्नेहरू वास्तवमा राजसंस्थाप्रति नै नकारात्मक रहेको टिप्पणी गरे।
निर्वाचनमा सहभागी भएको निर्णयको बचाउ गर्दै उनले भने, यदि राप्रपा चुनावमा नजाने हो भने संसदमा राजसंस्थाको आवाज नै कमजोर हुने थियो। अहिले संसदमा उक्त एजेन्डा उठिरहेको छ भने त्यसमा राप्रपाको भूमिका प्रमुख रहेको उनको दाबी छ।
पार्टीभित्र देखिएको विवादबारे पनि उनले बोले। चुनावअघि सबैलाई मिलाएर लैजाने प्रयास गर्दा अनुशासनहीन गतिविधि बढेको भन्दै अहिले पार्टीमा अनुशासनात्मक कारबाही प्रक्रिया सुरु गरिएको उनले जानकारी दिए।
