हज यात्रामा जाने श्रद्धालुलाई जेन जी पर्साको भावपूर्ण बिदाइ
अभिलाष गुप्ता
वीरगञ्ज, २७ वैशाख
वीरगञ्जमा जेन जी पर्सा ले हज यात्रामा जान लागेका मुस्लिम श्रद्धालुहरुलाई सम्मान तथा शुभकामनासहित बिदाइ गरेको छ। वीरगञ्ज महानगरपालिका वडा नं. २ स्थित छपकैया चौकमा आयोजित कार्यक्रममा हज यात्रुहरुलाई सफल, सुरक्षित र मंगलमय यात्राको शुभकामना दिइएको थियो।
कार्यक्रमलाई सम्बोधन गर्दै जेन जी पर्साका संयोजक महादेव प्रसाद कुर्मी ले हज यात्राले धार्मिक आस्था मात्र नभई विश्व शान्ति, मानवता र सद्भावको सन्देश फैलाउने बताए। उनले विश्वभर बढ्दो युद्ध, हिंसा र द्वन्द्व अन्त्यका लागि हज यात्राका क्रममा विशेष दुवा गर्न आग्रह गरे।
त्यसैगरी प्रमुख सल्लाहकार बिरेन्द्र कण्ठ ले समाजमा धार्मिक सहिष्णुता, आपसी सम्मान र एकताको भावना अझ बलियो बनाउन सबै समुदायबीच सद्भाव आवश्यक रहेको उल्लेख गरे। उनले देशमा शान्ति र अमन–चयन कायम रहोस् भन्ने कामनासहित यात्रुहरुलाई विशेष दुवा गर्न अनुरोध गरे।
कार्यक्रममा जेन जीका विभिन्न वडाका प्रतिनिधि, उप–संयोजक, सल्लाहकार तथा स्थानीय अगुवाहरूको सहभागिता रहेको थियो। सहभागीहरूले हज यात्राले समाजमा सकारात्मक सन्देश प्रवाह गर्ने विश्वास व्यक्त गरेका थिए।
