मधेश प्रदेश प्रहरी कार्यालयमा एसपी मानबहादुर राईको बिदाइ, ‘फेरि भेटौँला’ कार्यक्रम सम्पन्न
जनकपुरधाम, जेठ २६ — मधेश प्रदेश प्रहरी कार्यालय, जनकपुरधामबाट कोशी प्रदेश प्रहरी गण, विराटनगर मोरङमा काज/सरुवा भई जान लाग्नुभएका प्रहरी उपरीक्षक (एसपी) मानबहादुर राईलाई मंगलबार एक समारोहका बीच बिदाइ गरिएको छ।
नेपाल प्रहरी प्रधान कार्यालय मानवश्रोत विकास विभाग, कर्मचारी प्रशासन शाखा, नक्साल काठमाडौंको पत्रादेशअनुसार सरुवा भएका राईलाई मधेश प्रदेश प्रहरी कार्यालयमा आयोजित ‘बिदाइ तथा फेरि भेटौँला’ कार्यक्रममा सम्मानपूर्वक बिदाइ गरिएको हो।
कार्यक्रममा मधेश प्रदेश प्रहरी प्रमुख प्रहरी नायव महानिरीक्षक (डीआईजी) गोविन्द थपलियाको प्रमुख आतिथ्यता रहेको थियो। डीआईजी थपलियाले एसपी राईलाई माला, अबिर तथा मायाको चिनो प्रदान गर्दै आगामी कार्यकालको सफलताको शुभकामना व्यक्त गरेका थिए।
बिदाइ कार्यक्रममा प्रदेश प्रहरी कार्यालयका प्रहरी अधिकृत तथा कर्मचारीहरूको सहभागिता रहेको थियो। सहभागीहरूले एसपी राईले मधेश प्रदेशमा पुर्याएको योगदानको प्रशंसा गर्दै उज्ज्वल भविष्यको कामना गरेका थिए।
कार्यक्रम सौहार्दपूर्ण वातावरणमा सम्पन्न भएको मधेश प्रदेश प्रहरी कार्यालयले जनाएको छ।
