किस्ताबन्दीमा सामान दिने भन्दै रकम उठाएको ‘अभियान डिजिटल वर्ल्ड’ विवादमा, सयौँ सेवाग्राही ठगीमा परेको आरोप
वीरगञ्ज । किस्ताबन्दीमा विभिन्न सामग्री उपलब्ध गराउने उद्देश्यले सञ्चालन गरिएको ‘अभियान डिजिटल वर्ल्ड’ विरुद्ध करोडौँ रुपैयाँ ठगी गरेको आरोप लागेको छ। संस्थाले रकम संकलन गरेपछि सञ्चालकहरू सम्पर्कविहीन भएको भन्दै सयौँ सेवाग्राही र बजार प्रतिनिधिहरूले कानुनी कारबाहीको माग गरेका छन्।
पीडितहरूका अनुसार संस्थाले सदस्य बनाउने क्रममा प्रत्येक व्यक्तिबाट ३१ हजार ७२५ रुपैयाँका दरले रकम संकलन गरेको थियो। केही सदस्यलाई १२ देखि १५ हजार रुपैयाँ बराबरका सामग्री उपलब्ध गराइए पनि अधिकांश सेवाग्राहीले तीन वर्ष बितिसक्दा समेत आफूहरूले पाउनुपर्ने सामान नपाएको गुनासो गरेका छन्।
संस्थाका सञ्चालक दिपेश बर्नवाल, सुशील सर्राफ र विष्णु काफ्ले रकम संकलन गरेपछि सम्पर्कविहीन भएको पीडितहरूको आरोप छ। संस्थाका अर्का साझेदार ऋषिकान्त गुप्ता वीरगञ्जमै रहे पनि सेवाग्राहीको समस्या समाधान गर्न कुनै ठोस पहल नगरेको उनीहरूको दाबी छ।
यस्तै, संस्थाका लेखापाल तथा सञ्चालक दिपेश बर्नवालका छोरा योगेश बर्नवालविरुद्ध समेत उजुरी परेको एक बजार प्रतिनिधिले जानकारी दिएका छन्।
संस्थासँग आबद्ध बजार प्रतिनिधिहरूले पनि आफूहरू समस्यामा परेको बताएका छन्। उनीहरूका अनुसार संस्थाप्रति विश्वास गरेर सर्वसाधारणलाई सदस्य बनाए पनि अहिले सामान नपाएका सेवाग्राहीबाट गाली, दबाब र मानसिक तनाव सहनुपरेको छ।
पीडितहरूले आफूहरूबाट संकलन गरिएको रकम फिर्ता गराउन र घटनामा संलग्न व्यक्तिहरूमाथि कानुनी कारबाही गर्न माग गर्दै जिल्ला प्रशासन कार्यालय पर्सामा सामूहिक उजुरी दर्ता गरेका छन्।
जिल्ला प्रशासन कार्यालय पर्साले प्राप्त उजुरीमाथि आवश्यक अनुसन्धान प्रक्रिया अघि बढाइएको जनाएको छ। अनुसन्धानपछि घटनाको वास्तविक अवस्था, पीडितको संख्या र आर्थिक क्षतिको विवरण सार्वजनिक गरिने बताइएको छ।
