भारतीय कुखुराको अवैध आयात रोक्न माग गर्दै रौतहटका किसान आमरण अनशनमा
रौतहट। भारतबाट अवैध रूपमा कुखुरा तथा चल्ला नेपाल भित्रिने क्रम नरोकिएको भन्दै स्थानीय किसानको लगानी र व्यवसाय संकटमा परेको छ। यही समस्याको समाधान माग गर्दै जिल्ला कुखुरा व्यवसायी किसान संघ रौतहटका सचिव राधेश्याम साह आमरण अनशनमा बसेका छन्।
शुक्रबारदेखि जिल्ला प्रशासन कार्यालयअगाडि अनशन सुरु गरेका साहले भारतीय कुखुरा तथा चल्लाको अवैध आयात तत्काल नियन्त्रण गर्नुपर्ने माग गरेका छन्। स्थानीय प्रशासन र सुरक्षा निकायलाई पटक–पटक जानकारी गराउँदा पनि प्रभावकारी कदम नचालिएको उनको गुनासो छ।
किसानहरूको भनाइअनुसार खुला सीमाको फाइदा उठाउँदै भारतबाट ठूलो परिमाणमा सस्तो कुखुरा तथा चल्ला नेपाल भित्रिने गरेको छ। यसले नेपाली किसानले उत्पादन गरेको कुखुराले उचित बजार र मूल्य नपाउने अवस्था सिर्जना भएको छ।
उत्पादन लागत बढ्दै गए पनि किसानले उचित मूल्य नपाउने र उपभोक्ताले भने महँगो मूल्यमा मासु किन्नुपर्ने अवस्थाले बजारको मूल्य निर्धारण प्रणालीमाथि समेत प्रश्न उठेको छ।
किसान संघले अवैध आयात पूर्ण रूपमा रोक्न, तस्करीमा संलग्नमाथि कानुनी कारबाही गर्न तथा कुखुराको मूल्य निर्धारण प्रणाली पारदर्शी बनाउन माग गरेको छ।
सम्बन्धित निकायले मागप्रति गम्भीर चासो नदेखाएसम्म आफ्नो आमरण अनशन जारी रहने राधेश्याम साहले बताएका छन्। किसानको आन्दोलनले स्थानीय उत्पादन संरक्षण, सीमा क्षेत्रमा हुने अवैध व्यापार नियन्त्रण र बजार व्यवस्थापनको विषयलाई पुनः चर्चामा ल्याएको छ।
