बुटवल : इलाका प्रहरी कार्यालय पिपरा कपिलवस्तुबाट खटिएको प्रहरी टोलीले अवैध रूपमा भन्सार छलेर ल्याइएका सामानहरू बरामद गरेको छ। इलाका प्रहरी कार्यालय प्रमुख एवं प्रहरी निरीक्षक अर्जुन पौडेलको कमाण्डमा खटिएको ११ जनाको प्रहरी टोलीले भन्सार छलेर लुकिछिपी भारतीय बजारबाट ल्याएको युरिया र डिएपी मल बरामद गरेको हो।
५० केजीका २ सय १६ बोरा डिएपी र ५० केजीकै १० बोरा युरिया मल बरामद गरिएको प्रहरी निरीक्षक पौडेलले जानकारी दिए। उक्त मल नेपाली बजारमा विक्री गर्दा ५ लाख २८ हजार रुपैयाँ पर्छ।
बाणगंगा नगरपालिका–१० का सन्तराम थारुको घरबाट १ सय ५८ बोरा डिएपी, दशरथ शाहीको घरबाट २१ बोरा डिएपी, सिलाशान्ति कोहारको घरबाट ३३ बोरा डिएपी र सुलेमान मुसलवानको घरबाट १० बोरा युरीया र ४ बोरा डिएपी मल बरामद गरिएको प्रहरीले जनाएको छ।
