झापा प्रहरी प्रमुखको जिम्मेवारी सम्हालिन् एसपी बसुन्धरा खड्का
“कानुनविपरीत कार्य गर्ने कसैलाई पनि छुट दिइँदैन”
जिल्ला प्रहरी कार्यालय, झापाको नयाँ प्रमुखका रूपमा प्रहरी उपरीक्षक (एसपी) बसुन्धरा खड्काले औपचारिक रूपमा कार्यभार ग्रहण गर्नुभएको छ। सरुवापछि जिम्मेवारी सम्हाल्दै उहाँले झापामा शान्ति, सुरक्षा र कानुनी शासनलाई अझ मजबुत बनाउने स्पष्ट प्रतिबद्धता व्यक्त गर्नुभएको छ।
प्रहरी संगठनभित्र अनुशासित, क्षमतावान र परिणाममुखी अधिकृतका रूपमा परिचित एसपी खड्का विभिन्न स्थानमा सफल नेतृत्व प्रदान गरिसक्नुभएको छ। उहाँलाई दूरदर्शी सोचका साथ नवीन र सकारात्मक अभियानहरू अघि बढाउने बौद्धिक प्रहरी अधिकृतका रूपमा समेत चिनिन्छ।
सुरक्षाको दृष्टिले संवेदनशील मानिने झापा जिल्लामा कमाण्ड सम्हाल्दै एसपी खड्काले जिल्लालाई नमूना सुरक्षा क्षेत्रका रूपमा स्थापित गर्ने लक्ष्य राख्नुभएको छ। उहाँले अपराध नियन्त्रण, शान्ति सुरक्षा तथा सुशासन कायम गर्न सबै सरोकारवाला निकायसँग सहकार्य गर्दै कडा तर न्यायोचित रूपमा कानुन कार्यान्वयन गर्ने बताउनुभएको छ।
“कानुन विपरीत कार्य गर्ने जोसुकै भए पनि कारबाहीको दायरामा ल्याइनेछ,” उहाँको स्पष्ट सन्देश रहेको छ।
