राष्ट्रिय स्वतन्त्र पार्टी (रास्वपा) ले आजबाट झापाको दमक नगरपालिकामा चुनावी घरदैलो अभियान औपचारिक रूपमा सुरु गरेको छ। आगामी निर्वाचनलाई लक्षित गर्दै पार्टीले मतदाता–केन्द्रित अभियानलाई तीव्र बनाएको हो।
अभियानको पहिलो दिन पार्टीका स्थानीय नेता–कार्यकर्ता, स्वयंसेवक तथा समर्थकहरूको उल्लेख्य सहभागिता रहेको थियो। घरदैलो अभियानमार्फत रास्वपाले मतदातासँग प्रत्यक्ष संवाद गर्दै पार्टीको नीति, कार्यक्रम र उम्मेदवारका प्रतिबद्धता प्रस्तुत गरिरहेको छ।
आजको अभियानमा काठमाडौं महानगरपालिकाका मेयर बालेन शाहकी पत्नी सबिना काफ्ले पनि सहभागी भएकी छन्। उनको सहभागिताले अभियानमा थप आकर्षण र उत्साह थपिएको देखिएको छ। स्थानीयवासीहरूसँग भेटघाट गर्दै उनले परिवर्तन, सुशासन र जवाफदेही राजनीतिको आवश्यकता औंल्याइन्।
रास्वपाका नेताहरूले दमकलाई संगठन विस्तार र जनसमर्थन सुदृढीकरणको महत्वपूर्ण केन्द्रका रूपमा लिएको बताएका छन्। घरदैलो अभियान केही दिनसम्म दमकका विभिन्न वडामा सञ्चालन गरिने पार्टीले जनाएको छ।
