माउन्ट मकालु स्कूलमा निःशुल्क आँखा जाँच शिविर सम्पन्न
वीरगञ्ज, १० जेठ
वीरगञ्ज महानगरपालिका–१० अशोक वाटिकास्थित Mount Makalu Secondary School को आयोजनामा एक दिने निःशुल्क आँखा जाँच शिविर सम्पन्न भएको छ। विद्यालय परिसरमा आयोजित उक्त शिविरमा विद्यार्थी, अभिभावक तथा स्थानीय बासिन्दाहरूको उत्साहजनक सहभागिता रहेको थियो।
शिविर Birgunj Community Eye Center तथा Tilganga Eye Hospital को प्राविधिक सहयोगमा सञ्चालन गरिएको हो। कार्यक्रममा अनुभवी अप्टोमेट्रिस्ट प्रभात चौधरीले सहभागीहरूको आँखा परीक्षण गरेका थिए भने श्रीती चौधरी र ओमप्रकाश चौधरीले सहजीकरण तथा व्यवस्थापनमा सहयोग गरेका थिए।
शिविर अन्तर्गत सेवाग्राहीहरूलाई निःशुल्क पूर्ण आँखा परीक्षण सेवा प्रदान गरिएको थियो। साथै, चस्मा खरिदमा २५ प्रतिशत छुटको व्यवस्था गरिएको आयोजकले जानकारी दिएका छन्। मोतियाबिन्दु सम्बन्धी समस्या भएका बिरामीहरूलाई निःशुल्क शल्यक्रिया सेवा उपलब्ध गराइने समेत जनाइएको छ।
विद्यालयका प्रधानाध्यापक राहुल श्रीवास्तवका अनुसार कार्यक्रमको मुख्य उद्देश्य विद्यालय समुदायमा आँखा स्वास्थ्यप्रति सचेतना अभिवृद्धि गर्नुका साथै प्रारम्भिक अवस्थामै आँखा सम्बन्धी समस्याको पहिचान गर्नु रहेको हो। उनले यस्ता सामाजिक उत्तरदायित्वमूलक कार्यक्रमले विद्यार्थी र समुदायलाई प्रत्यक्ष लाभ पुग्ने विश्वास व्यक्त गरे।
विद्यालय प्रशासनले आगामी दिनहरूमा पनि शिक्षा, स्वास्थ्य तथा सामाजिक चेतनामूलक कार्यक्रमलाई निरन्तरता दिने प्रतिबद्धता जनाएको छ।
