सञ्चारमाध्यमबाट म्यादको जानकारी पाएपछि मेयर राजेश मान सिंह अदालतमा उपस्थित
वीरगञ्ज महानगरपालिकाका प्रमुख राजेशमान सिंह आज पर्सा जिल्ला अदालतमा उपस्थित हुनुभएको छ । उहाँ बिहान ९ बजे कार्यालय समय सुरु हुनासाथ अदालत पुग्नुभएको हो ।
आफ्नो मुद्दामा अदालतबाट म्याद जारी भएको जानकारी सञ्चारमाध्यममार्फत पाएपछि न्यायिक प्रक्रियामा सहयोग पुर्याउन स्वेच्छाले अदालतमा उपस्थित भएको मेयर सिंहले बताउनुभएको छ ।
यद्यपि, मुद्दाको चाप बढी रहेका कारण आज उहाँको मुद्दामा सुनुवाइ हुन नसकेको अदालत स्रोतले जनाएको छ । सुनुवाइ नभएपछि मेयर सिंह अदालतबाट फर्किनुभएको बताइएको छ ।
