नृसिंह माध्यमिक विद्यालयमा लागु औषध विरुद्ध सचेतना प्रशिक्षण सम्पन्न, ९१ जना विद्यार्थी तथा शिक्षक सहभागी
वीरगञ्ज, १३ जेठ
समुदाय–प्रहरी साझेदारी कार्यक्रम अन्तर्गत जिल्ला प्रहरी कार्यालय पर्साको आयोजनामा लागु औषध विरुद्ध सचेतना सम्बन्धी एक दिवसीय प्रशिक्षण कार्यक्रम सम्पन्न भएको छ। कार्यक्रम वीरगञ्ज महानगरपालिका–१४ स्थित नृसिंह माध्यमिक विद्यालयमा सञ्चालन गरिएको हो।
बिहान करिब ०९:०० बजेबाट सुरु भएको उक्त कार्यक्रममा कक्षा ९, १० र ११ मा अध्ययनरत विद्यार्थी, शिक्षक तथा शिक्षिकाहरू गरी कुल ९१ जनाको सक्रिय सहभागिता रहेको थियो। कार्यक्रमको मुख्य उद्देश्य युवावर्गमा बढ्दो लागु औषध दुर्व्यसनबारे सचेतना फैलाउनु र यसबाट हुने जोखिम तथा कानुनी परिणामबारे जानकारी गराउनु रहेको थियो।
कार्यक्रममा जिल्ला प्रशासन कार्यालय पर्साका सहायक प्रमुख जिल्ला अधिकारी कृष्ण थापा प्रमुख अतिथिका रूपमा उपस्थित रहनुभएको थियो। उहाँले लागु औषध दुर्व्यसन अहिले समाजका लागि गम्भीर चुनौतीको रूपमा देखा परेको उल्लेख गर्दै यसलाई नियन्त्रण गर्न विद्यालय, परिवार, प्रहरी र समुदाय सबैको संयुक्त प्रयास आवश्यक रहेको बताउनुभयो। उहाँले विशेषगरी किशोर–किशोरीहरूमा सचेतना विस्तार गर्न सके मात्र दीर्घकालीन समाधान सम्भव हुनेमा जोड दिनुभयो।
त्यसैगरी, जिल्ला प्रहरी कार्यालय पर्सामा कार्यरत प्रहरी निरीक्षक (प्र.नि.) अमृत बहादुर बस्नेतले प्रशिक्षण सत्र सञ्चालन गर्नुभएको थियो। उहाँले लागु औषधका विभिन्न प्रकार, यसको सेवन तथा कारोबारबाट हुने शारीरिक, मानसिक र सामाजिक असरहरूबारे विस्तृत जानकारी दिनुभयो। साथै, लागु औषध प्रयोग तथा ओसारपसार सम्बन्धी कानुनी सजाय, पक्राउ प्रक्रिया तथा सजग रहनुपर्ने उपायहरूबारे पनि स्पष्ट पार्नुभयो।
प्रशिक्षणका क्रममा विद्यार्थीहरूलाई लागु औषधको लतले व्यक्तिको भविष्य, परिवार र समाजमा पार्ने नकारात्मक प्रभावबारे उदाहरणसहित बुझाइएको थियो। साथै, साथी समूहको दबाबमा परेर गलत बाटो नअपनाउन विशेष सुझाव दिइएको थियो।
कार्यक्रम अन्तर्गत सहभागी विद्यार्थी तथा शिक्षकहरूले विभिन्न जिज्ञासा राखेका थिए, जसको उत्तर प्रहरी अधिकृतहरूले व्यवहारिक उदाहरणसहित दिएका थिए। सहभागीहरूले यस्तो प्रकारको प्रशिक्षणले आफूहरूमा सकारात्मक सोच विकास गर्न सहयोग पुगेको प्रतिक्रिया दिएका थिए।
जिल्ला प्रहरी कार्यालय पर्साले समुदाय–प्रहरी साझेदारी कार्यक्रम अन्तर्गत आगामी दिनमा पनि विद्यालय, कलेज तथा समुदायस्तरमा यस्ता सचेतनामूलक कार्यक्रमलाई निरन्तरता दिइने जनाएको छ।
