प्रमुख प्रशासकीय अधिकृत नहुँदा रोकियो तलब, मेयरलाई दोष दिनु भ्रामक : वीरगञ्ज महानगर
वीरगञ्ज । कर्मचारीहरूको तलब भुक्तानीमा भएको ढिलाइको कारण मेयर नभई प्रमुख प्रशासकीय अधिकृतको अभाव रहेको भन्दै वीरगञ्ज महानगरपालिकाले मेयर राजेशमान सिंहमाथि लगाइएका आरोप असत्य र भ्रामक भएको जनाएको छ।
महानगरका अनुसार प्रमुख प्रशासकीय अधिकृत लामो समय हाजिर नभएका कारण आर्थिक तथा प्रशासनिक कामकाज प्रभावित हुँदा तलब वितरण प्रक्रिया रोकिएको थियो। समस्या समाधानका लागि मेयर सिंहले मन्त्रालय तथा सम्बन्धित निकायसँग निरन्तर समन्वय र पहल गरेका थिए।
नयाँ प्रमुख प्रशासकीय अधिकृतको व्यवस्था भएपछि असार १ गतेदेखि प्रशासनिक तथा आर्थिक कामकाज नियमित बन्दै गएको र कर्मचारीहरूको तलब भुक्तानी प्रक्रिया पनि सुचारु भएको महानगरले जनाएको छ।
महानगरले तलब रोक्ने सम्बन्धमा मेयरबाट कुनै निर्णय नभएको स्पष्ट पार्दै वास्तविकता विपरीत प्रचार नगर्न आग्रह गरेको छ।
