* वीरगञ्जमा लागू औषध ट्रामाडोलसहित ट्रक नियन्त्रण, चालक पक्राउ*
*वीरगञ्ज, पर्सा* – जिल्ला प्रहरी कार्यालय पर्साले प्रतिबन्धित लागू औषधसहितको मालवाहक ट्रक नियन्त्रणमा लिएको छ।
जिल्ला प्रहरी कार्यालय पर्साका अनुसार मिति २०८१/०१/०९ गते राति १:५ बजे वीरगञ्ज महानगरपालिका वडा नं. १४, गण्डकचोकस्थित सडकखण्डबाट बिलभन्दा बढी सामान लोड गरी काठमाडौं र मोरङतर्फ लैजाँदै गरेको बा.प्र. ०३-००१ ख ३२४६ नम्बरको ट्रक शंकास्पद भई चेकजाँच गरिएको थियो।
चेकजाँचका क्रममा ट्रकबाट लागू औषध *Tramadol Hydrochloride Ip-50 Tramol* ट्याब्लेट १ लाख २० हजार ६ सय २० ट्याब्लेट बरामद भएको छ। उक्त औषधको बजार मूल्य रु. ९ लाख ८४ हजार २ सय ५१ बराबर रहेको प्रहरीले जनाएको छ।
घटनामा संलग्न ट्रक र चालक मकवानपुर थाहा नगरपालिका वडा नं. ७ बस्ने वर्ष २३ का सुशिल घलेलाई नियन्त्रणमा लिइएको छ। पक्राउ परेका चालकसहित ट्रकलाई थप अनुसन्धान र कारबाहीका लागि राजस्व अनुसन्धान कार्यालय, पथलैया, बारामा बुझाइएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले जानकारी दिनुभयो।
प्रहरीले बिलभन्दा बढी सामान ओसारपसार गर्ने ट्रकहरूलाई निगरानी बढाएको जनाएको छ।
