बर्दियामा ३२ लाखभन्दा बढीका अवैध सामानसहित मिनी ट्रक नियन्त्रणमा, दुई जना पक्राउ
बर्दिया, असार २४ — बर्दियाको मधुवन नगरपालिका–४ क्षेत्रमा प्रहरीले भन्सार छली गरी ल्याइएका करिब रु. ३२ लाख ६३ हजार ६ सय बराबरका विभिन्न सामानसहित एक मिनी ट्रक नियन्त्रणमा लिएको छ। घटनामा संलग्न रहेको आरोपमा दुई जनालाई पक्राउ गरिएको प्रहरीले जनाएको छ।
इलाका प्रहरी कार्यालय ढोढरीका प्रहरी निरीक्षक शैलेन्द्र खड्काको नेतृत्वमा नियमित सवारी जाँचका क्रममा कैलालीबाट तारातालतर्फ जाँदै गरेको सु.प.प्र. ०१–००१ क १९९१ नम्बरको मिनी ट्रकमा खानतलासी गर्दा ठूलो परिमाणमा भन्सार प्रक्रिया पूरा नगरिएका फेन्सी कपडा तथा अन्य सामग्री फेला परेको थियो।
पक्राउ पर्नेमा कैलालीको घोडाघोडी नगरपालिका–११ का ४४ वर्षीय चुनु राम चौधरी र टिकापुर नगरपालिका–१ का ३० वर्षीय अजय चौधरी रहेका छन्।
बरामद सामानमा टिसर्ट, अन्डरवेयर, रेनकोट, जिन्स, ट्राउजर, स्पोर्ट्स पाइन्ट, टोपी, छाता, बेल्ट, खादा, विन्डचिटर र टावललगायतका सामग्री रहेका छन्। बरामद सामान र मिनी ट्रकको अनुमानित मूल्य रु. ३२ लाख ६३ हजार ६ सय रहेको प्रहरीले जनाएको छ।
पक्राउ परेका दुवै व्यक्ति, बरामद सामान तथा सवारी साधनलाई आवश्यक अनुसन्धान र थप कानुनी कारबाहीका लागि भन्सार कार्यालय, गुलरिया पठाउने प्रक्रिया अघि बढाइएको प्रहरीले जनाएको छ। साथै सीमा क्षेत्रमा हुने भन्सार छली तथा अवैध ओसारपसारविरुद्ध निगरानी अझ कडा बनाइने पनि प्रहरीले स्पष्ट पारेको छ।
