वीरगञ्जमा भोलि गहवामाईको चौथो विशाल रथयात्रा, आस्था नेपालद्वारा प्रसाद वितरण
वीरगञ्ज, पर्सा। वीरगञ्जको ऐतिहासिक तथा प्रसिद्ध गहवामाई मन्दिरबाट भोलि असार ३२ गते (बिहीबार) बिहान ७ बजेदेखि चौथो विशाल रथयात्रा आयोजना हुँदैछ। धार्मिक आस्था, सामाजिक सद्भाव र सांस्कृतिक एकताको सन्देश बोकेको यस रथयात्रामा हजारौँ श्रद्धालु भक्तजन सहभागी हुने अपेक्षा गरिएको छ।
रथयात्रा वीरगञ्जका विभिन्न मुख्य सडक हुँदै नगर परिक्रमा गर्ने कार्यक्रम रहेको छ। आयोजकले सम्पूर्ण भक्तजनलाई परिवार, आफन्त तथा साथीभाइसँग रथयात्रामा सहभागी भई धार्मिक सहिष्णुता, एकता र सद्भावलाई थप मजबुत बनाउन आग्रह गरेको छ।
यसैबीच, सामाजिक संस्था आस्था नेपाल ले रथयात्रामा सहभागी हुने श्रद्धालुहरूका लागि आदर्शनगर चोकमा निःशुल्क प्रसाद वितरण गर्ने जनाएको छ। संस्थाले भक्तजनलाई प्रसाद ग्रहण गर्न तथा कार्यक्रमलाई सफल बनाउन सहयोग गर्न अनुरोध गरेको छ।
गहवामाईको रथयात्रा वीरगञ्जको प्रमुख धार्मिक पर्वमध्ये एक मानिन्छ, जसले हरेक वर्ष ठूलो संख्यामा श्रद्धालु तथा दर्शनार्थीलाई आकर्षित गर्दै आएको छ।
