आन्दोलनमा घाइते आनन्द दासको काठमाडौंमा उपचार जारी, स्वास्थ्यमा सुधार
जनकपुरधाम । दुई समुदायबीचको तनावपछि चर्किएको आन्दोलनका क्रममा जनकपुरधाम–८ मा भएको झडपमा गम्भीर घाइते भएका आनन्द कुमार दासको काठमाडौंस्थित राष्ट्रिय ट्रमा सेन्टरमा उपचार जारी छ।
टाउकोमा गम्भीर चोट लागेपछि दासलाई प्रारम्भमा प्रादेशिक अस्पताल जनकपुरधाममा उपचार गराइएको थियो। अवस्था गम्भीर भएपछि थप उपचारका लागि काठमाडौं पठाइएको र राष्ट्रिय ट्रमा सेन्टरमा टाउकोको शल्यक्रिया गरिएको जनाइएको छ।
हाल दासको स्वास्थ्य अवस्थामा क्रमिक सुधार भइरहेको स्वतन्त्र नागरिक अभियानका प्रतिनिधि राजेन्द्र खनालले जानकारी दिएका छन्। उनको उपचारमा स्वतन्त्र नागरिक अभियानका संयोजक ऋषि धमला, राजेन्द्र खनाल तथा पत्रकार अनिलकुमार निरालालगायतले आवश्यक समन्वय तथा पहल गरिरहेको बताइएको छ।
यसैबीच, आन्दोलन तथा झडपका क्रममा घाइते भएकाहरूको उपचारमा कुनै कमी हुन नदिन सम्बन्धित निकायले विशेष ध्यान दिनुपर्ने माग गरिएको छ। तनाव थप हिंसात्मक बन्न नदिन प्रशासन, राजनीतिक दल, नागरिक समाज तथा समुदायका अगुवाले संयम अपनाउँदै संवाद र सहकार्यलाई प्राथमिकता दिनुपर्नेमा जोड दिइएको छ।
