भदौ महिनाको ‘उत्कृष्ट प्रहरी’ घोषित, प्रहरी सहायक हवल्दार जितेन्द्र प्रसाद यादव सम्मानित
वीरगन्ज, असोज ८ । जिल्ला प्रहरी कार्यालय पर्साले २०८३ साल भदौ महिनाका लागि ‘Best Police of the Month’ अर्थात् महिनाको उत्कृष्ट प्रहरीका रूपमा वडा प्रहरी कार्यालय श्रीपुर, पर्सामा कार्यरत प्रहरी सहायक हवल्दार जितेन्द्र प्रसाद यादवलाई घोषणा गरेको छ।
जिल्ला प्रहरी कार्यालय पर्साका कार्यालय प्रमुख प्रहरी उपरीक्षक पवन कुमार भट्टराईले ‘महिनाको उत्कृष्ट प्रहरी छनौट कार्यविधि–२०८३’ बमोजिम यादवलाई भदौ महिनाको उत्कृष्ट प्रहरीका रूपमा छनोट गरेका हुन्।
उत्कृष्ट प्रहरी छनोटपछि प्रहरी उपरीक्षक भट्टराईले प्रहरी सहायक हवल्दार यादवलाई प्रशंसा पत्र तथा पुरस्कार प्रदान गर्दै सम्मान गरेका छन्। कार्यक्रममा यादवको कार्यसम्पादनको प्रशंसा गर्दै आगामी दिनमा पनि जिम्मेवारी, अनुशासन र व्यावसायिकतालाई निरन्तरता दिन शुभकामना दिइएको छ।
जिल्ला प्रहरी कार्यालय पर्साले प्रहरी कर्मचारीको कार्यसम्पादन, जिम्मेवारीप्रतिको लगनशीलता तथा उत्कृष्ट योगदानलाई प्रोत्साहन गर्ने उद्देश्यले ‘महिनाको उत्कृष्ट प्रहरी’ छनोट गर्दै आएको जनाएको छ।
भदौ महिनाको उत्कृष्ट प्रहरीका रूपमा सम्मानित यादवलाई जिल्ला प्रहरी कार्यालय पर्साले हार्दिक बधाई तथा शुभकामना व्यक्त गरेको छ।
